अकलुज पोलिसांची मोठी कारवाई | सावकारी प्रकरणी १० आरोपींवर गुन्हा दाखल

अकलुजमध्ये सावकारीच्या जाळ्यात व्यापारी! – १० जणांविरुद्ध गुन्हा दाखल
अकलुज प्रतिनिधी :

अकलुज शहरात सावकारीच्या जाळ्यात अडकलेल्या एका व्यापाऱ्याने आत्महत्येचा प्रयत्न केल्यानंतर, पोलिसांनी तब्बल दहा सावकारांविरुद्ध महाराष्ट्र सावकारी अधिनियमान्वये गुन्हा दाखल केला आहे.

फिर्यादी मुनावर गुलमहंमद खान (वय ४८, व्यवसाय: राईस गाडा, रा. जुना बाजारतळ, अकलुज, ता. माळशिरस, जि. सोलापूर) यांनी दिलेल्या फिर्यादीत म्हटले आहे की, सन २०२१ पासून विविध खाजगी सावकारांकडून घेतलेल्या रकमेबाबत वारंवार त्रास दिला जात होता.

दिनांक ०६ नोव्हेंबर २०२५ रोजी सकाळी १० वाजता, आरोपी सिद्धार्थ पवार हा फिर्यादीच्या घरी जाऊन गोंधळ घालू लागला. त्याने फिर्यादीस तसेच त्यांच्या आई व बहिणीचा उल्लेख करून शिवीगाळ केली, मुदत व व्याजाचे पैसे एका तासात द्यावेत, अन्यथा “वाईट परिणाम होतील” अशी धमकी दिली. फिर्यादीच्या पत्नी व मुलांनाही शिवीगाळ करून अंगावर धावून गेल्याचे नमूद आहे.

सदर त्रासामुळे संतप्त होऊन फिर्यादीने दुपारी १२.१५ वाजता नव्या एस.टी. स्टँडसमोरील बागेत “बुटेक्स” नावाचे विष प्राशन केले. तिथेच ते बेशुद्ध पडले असता त्यांच्या परिचितांनी माहिती देताच मुलाने त्यांना तत्काळ अकलुज येथील अपेक्स हॉस्पिटलमध्ये दाखल केले.

फिर्यादी शुद्धीवर आल्यानंतर त्यांनी पोलिसांसमोर दिलेल्या जबाबावरून खालील १० जणांविरुद्ध गु.र.नं. ७३०/२०२५ नुसार BNS कलम ३५१(२), ३५१(३), ३५२, ३२४(४), ३(५) तसेच महाराष्ट्र सावकारी अधिनियम कलम ३९, ४५ प्रमाणे गुन्हा दाखल करण्यात आला आहे.

🔹 आरोपींची नावे पुढीलप्रमाणे आहेत:
1️⃣ अनिल मदने (रा. महादेवनगर, अकलुज)
2️⃣ सिद्धार्थ पवार (रा. अकलुज)
3️⃣ मनोज साळुंखे (रा. अकलुज)
4️⃣ भैय्या दत्तात्रय जगदाळे (रा. सराटी, ता. इंदापूर, जि. पुणे)
5️⃣ गुरु पवार (रा. लोणार गल्ली, अकलुज)
6️⃣ सोनु मोहीते (रा. संग्रामनगर, माळशिरस)
7️⃣ गौरव माने (रा. मळोली, माळशिरस)
8️⃣ अवधुत शेंडगे (रा. वेळापूर, माळशिरस)
9️⃣ सचिन खिलारे (रा. अकलुज)
🔟 विलास मारकड (रा. खुडुस, माळशिरस)

सदर आरोपी सध्या घर सोडून फरार असून, त्यांचा शोध सुरू आहे. त्यांच्याबाबत कोणतीही माहिती मिळाल्यास अकलुज पोलीस ठाण्याशी संपर्क साधावा, असे आवाहन पोलिसांनी केले आहे.

तसेच खाजगी सावकारीच्या बेकायदेशीर व्यवहारांबाबत तक्रारी असल्यास, नागरिकांनी पुढे येऊन पोलीस ठाण्यात माहिती द्यावी, असे आवाहनही अकलुज पोलिसांकडून करण्यात आले आहे.