विद्यार्थ्यांच्या आयुष्याला दिशा देणाऱ्या शिक्षकाचा सन्मान; प्रदीप कोले यांना मानाचा पुरस्कार

डॉ.पंजाबराव देशमुख राष्ट्रीय शिक्षक परिषद, सोलापूर यांच्या वतीने क्रांतीसूर्य महात्मा ज्योतिबा फुले स्मृतिदिनानिमित्त दिला जाणारा प्रतिष्ठेचा महात्मा ज्योतिराव फुले जिल्हास्तरीय गुणवंत शिक्षक पुरस्कार”

यावर्षी श्री चंद्रशेखर विद्यालय प्राथमिक विभाग, श्रीपूर येथील संवेदनशील, कर्तव्यदक्ष व विद्यार्थ्यांच्या आयुष्याला दिशा देणारे शिक्षक श्री. प्रदीप कोले यांना जाहीर झाला आहे. ही बाब संपूर्ण शिक्षण क्षेत्रासह मित्रपरिवार, सहकारी व पालकांसाठी अत्यंत गौरवाची व अभिमानाची ठरली आहे.

विद्या विना मती गेली, मती विना नीती गेली हा क्रांतीसूर्य महात्मा ज्योतिबा फुले यांचा विचार प्रत्यक्ष कृतीत उतरवत श्री. प्रदीप कोले यांनी शिक्षण क्षेत्रात आपली स्वतंत्र ओळख निर्माण केली आहे. त्यांनी शिक्षणाकडे केवळ अभ्यासक्रमापुरते मर्यादित न ठेवता, विद्यार्थ्यांमध्ये आत्मविश्वास, मूल्यसंस्कार, समता व सामाजिक भान रुजविण्याचे कार्य निःस्वार्थपणे केले आहे.

ग्रामीण भागातील विद्यार्थ्यांच्या अडचणी ओळखून, त्यांच्या सुप्त गुणांना वाव देणे, त्यांना जीवनातील आव्हानांना सामोरे जाण्यास सक्षम बनवणे, तसेच शिक्षणाच्या माध्यमातून समाजपरिवर्तनाचा ध्यास घेणे — हे त्यांच्या शिक्षकधर्माचे ठळक वैशिष्ट्य मानले जाते. विद्यार्थ्यांच्या डोळ्यांत आशेचा प्रकाश आणि मनात आत्मविश्वास निर्माण करण्यासाठी त्यांनी सातत्याने प्रयत्न केले आहेत.

या मानाच्या पुरस्कारामुळे श्री. प्रदीप कोले यांचे शैक्षणिक, सामाजिक व मूल्याधिष्ठित कार्य अधिक उजळून निघाले असून, हा सन्मान म्हणजे त्यांच्या प्रामाणिक श्रमांचा, सेवाभावाचा व महात्मा फुले यांच्या विचारांशी असलेल्या दृढ नात्याचा साक्षीदार आहे.

या हृदयस्पर्शी यशाबद्दल विविध शैक्षणिक संस्था, शिक्षकवृंद, पालक व मित्रपरिवारातून त्यांच्यावर अभिनंदनाचा वर्षाव होत असून, त्यांच्या प्रेरणादायी कार्यामुळे भविष्यातही असंख्य विद्यार्थ्यांच्या आयुष्यात ज्ञानाचा दीप उजळत राहील, अशी भावना सर्वत्र व्यक्त होत आहे.