बारामतीच्या श्रावणी कुदळेची देशभरात दमदार कामगिरी; NEET-UG 2026 मध्ये AIR-5, मुलींमध्ये देशात प्रथम

बारामती | प्रतिनिधी

पुणे जिल्ह्यातील बारामतीची कन्या श्रावणी कृष्णा कुदळे हिने राष्ट्रीय पात्रता व प्रवेश परीक्षा (NEET-UG 2026) मध्ये देशपातळीवर घवघवीत यश संपादन करत महाराष्ट्राच्या शिरपेचात मानाचा तुरा खोवला आहे. श्रावणीने ७२० पैकी ७१० गुण मिळवत ऑल इंडिया रँक (AIR) 5 पटकावला असून देशातील सर्व मुलींमध्ये प्रथम क्रमांक मिळविण्याचा मानही तिने मिळवला आहे. विशेष म्हणजे, तिने पहिल्याच प्रयत्नात हे उल्लेखनीय यश मिळवून राज्यातील लाखो विद्यार्थ्यांसमोर आदर्श निर्माण केला आहे.

बारामती लोकसभा मतदार संघातील दौंड तालुक्यातील खडकी येथील श्रावणी जयश्री कृष्णा कुदळे या विद्यार्थिनीने NEET-2026 परीक्षेत 720 पैकी 710 गुण मिळवून देशात 5 वा आणि महाराष्ट्रात प्रथम क्रमांक मिळविला. श्रावणी ही जिल्हा परिषद पुणेचे आदर्श शिक्षक पुरस्कार विजेते शिक्षक कृष्णा कुदळे यांची कन्या आहे.

श्रावणीचे आई-वडील दोघेही जिल्हा परिषद शाळेत शिक्षक आहेत. साध्या कुटुंबातून आलेल्या श्रावणीने मेहनत, शिस्त आणि सातत्यपूर्ण अभ्यासाच्या जोरावर देशातील सर्वोच्च गुणवंत विद्यार्थ्यांच्या यादीत स्थान मिळवले. तिच्या या यशामुळे बारामतीसह संपूर्ण महाराष्ट्रात आनंदाचे वातावरण असून विविध स्तरांतून तिच्यावर अभिनंदनाचा वर्षाव होत आहे.

श्रावणीने आपल्या यशाचे श्रेय आई-वडिलांचे मार्गदर्शन, शिक्षकांचे सहकार्य आणि नियमित अभ्यासाला दिले आहे. अभ्यासाचे योग्य नियोजन, प्रत्येक विषयाची संकल्पना स्पष्ट ठेवणे, नियमित सराव आणि आत्मविश्वास या चार गोष्टी यशामागील प्रमुख कारणे असल्याचे तिने सांगितले. स्पर्धा परीक्षेची तयारी करणाऱ्या विद्यार्थ्यांनी गुणांच्या तणावापेक्षा संकल्पना समजून घेण्यावर भर द्यावा, असा संदेशही तिने दिला.

वैद्यकीय क्षेत्रात करिअर घडविण्याचे स्वप्न बाळगणाऱ्या श्रावणीची पुढील वाटचाल एमबीबीएस शिक्षणाकडे असून देशातील सर्वोत्तम वैद्यकीय संस्थांमध्ये प्रवेश घेण्याची तिची इच्छा आहे. तिच्या या यशामुळे ग्रामीण भागातील विद्यार्थ्यांनाही कठोर परिश्रम आणि योग्य मार्गदर्शनाच्या बळावर राष्ट्रीय स्तरावर यश मिळविता येते, हा विश्वास अधिक दृढ झाला आहे.

श्रावणीच्या उल्लेखनीय यशाची दखल राज्यातील मान्यवरांनीही घेतली आहे. उपमुख्यमंत्री सुनेत्रा पवार यांनी दूरध्वनीद्वारे तिचे अभिनंदन करून पुढील शैक्षणिक वाटचालीसाठी शुभेच्छा दिल्या. तसेच लोकप्रतिनिधी, शिक्षक, सामाजिक संस्था आणि नागरिकांकडूनही तिच्यावर शुभेच्छांचा वर्षाव होत आहे.

बारामतीच्या या गुणवंत विद्यार्थिनीने केवळ स्वतःचे आणि आपल्या कुटुंबाचेच नव्हे, तर संपूर्ण महाराष्ट्राचे नाव राष्ट्रीय स्तरावर उज्ज्वल केले आहे. तिची कामगिरी आगामी काळात NEET तसेच इतर स्पर्धा परीक्षांची तयारी करणाऱ्या विद्यार्थ्यांसाठी प्रेरणादायी ठरणार असून, मेहनत, चिकाटी आणि योग्य दिशेने केलेले प्रयत्न यशाची शिखरे गाठू शकतात, हे श्रावणीने आपल्या यशातून सिद्ध करून दाखवले आहे.