मतमोजणीच्या पार्श्वभूमीवर पोलिसांकडून कडक कारवाईचे प्रसिध्दी पत्रक… | Loksabha 2024

होऊ शकते ऍडमिनवर कारवाई? | सोशल मीडियावर असणार नजर | भावना  दुखावणाऱ्या पोस्ट करू नये | अकलूज पोलीस ऍक्शन मोड मध्ये

श्रीपूर : 4 जून रोजी लोकसभेची मतमोजणी होणार आहे. या पार्श्वभूमीवर कुठेही कायदा सुव्यवस्थेचा प्रश्न निर्माण होऊ नये, शांततेत मतमोजणी पार पाडावी व नागरिकांनी नियमाचे पालन करावे या पार्श्वभूमी वरती अचार संहितेचा भंग करणार्या नागरीकांवर अकलुज पोलीस कायदेशीर कारवाई करणार असल्याचे प्रसिध्दी पत्रकाद्वारे जाहीर केले आहे. 

सदर प्रसिध्दी पत्रकामध्ये अकलूज पोलीस ठाणे हद्दीतील नागरिकांना  पो.नि.भानुदास निंभोरे यांनी सुचीत केले की,  माढा लोकसभा सार्वत्रिक निवडणूक २०२४ च्या अनुषंगाने दि. १६/३/२०२४ रोजी पासून ते दि. ६/६/२०२४ पर्यंत आदर्श आचारसंहिता अंमलात असून सोलापूरसह संपूर्ण देशभरात लोकसभा सार्वत्रिक निवडणूक २०२४ चा निकाल दि. ४/६/२०२४ रोजी जाहीर होणार आहे. त्या अनुषंगाने कोणीही नागरिक सदर निवडणूक निकाल जाहीर झाल्यानंतर सोशल मीडियाद्वारे फेसबुक, इन्स्टाग्राम, व्हाट्सअप ग्रुप व इतर तत्सम ॲप्लीकेशन माध्यमांद्वारे कोणत्याही समाजाच्या, जाती-धर्माच्या, धार्मिक भावना दुखावतील, अशा स्वरूपाच्या पोस्ट्स, कमेंट्स, स्टोरी, स्टेटस, डिजिटल बॅनर असे प्रकार वरील माध्यमांद्वारे करू नये.

तसेच कोणाच्याही विरोधात घोषणाबाजी करू नये. डीजे वाजणार नाहीत, फटाके फोडणार नाहीत, तसेच विनापरवाना विजयी मिरवणूक काढू नये. त्याचबरोबर व्हाट्सअप ग्रुपचे ॲडमिन यांनी दि. ३/६/२०२४ ते दि. ५/६/२०२४ या कालावधीत त्यांच्या ग्रुप सेटिंगमध्ये ओन्ली ॲडमिन करून बदल करून घ्यावा. जेणेकरून ग्रुप मधील कोणताही सदस्य वादग्रस्त पोस्ट ग्रुपवर टाकणार नाही. जर ॲडमिन यांनी सेटिंगमध्ये बदल केला नाही व कोणी सदस्याने वादग्रस्त पोस्ट टाकल्याने काही कायदा व सुव्यवस्था प्रश्न निर्माण झाल्यास पोस्ट करणाऱ्या सदस्यासह ग्रुप ॲडमिनला जबाबदार धरून योग्य ती कायदेशीर कारवाई करण्यात येईल.