अकलूज हादरले: पहाटे भीषण आग, मशीनरी दुकान जळाले, अग्निशामक दलाची निर्णायक भूमिका

अकलूजमध्ये पहाटे भीषण आग; रूपाली मशीनरीचे ८० लाखांचे नुकसान, पांडुरंग कारखान्याच्या अग्निशामक दलामुळे अनर्थ टळला

अकलूज पहाटेच्या आगीत लाखोंचे नुकसान; पांडुरंग सहकारी साखर कारखान्याच्या अग्निशामक यंत्रणेचे कौतुक

अकलूज प्रतिनिधी केदार  लोहकरे :
अकलूज शहरातील महावीर पथावर असलेल्या रूपाली मशीनरी अँड पाईप्स या दुकानाला गुरुवारी पहाटे सुमारे ४ वाजण्याच्या सुमारास शॉर्ट सर्किटमुळे अचानक आग लागली. या आगीत दुकानातील शेतीसाठी लागणारे महागडे साहित्य, वाहने, फर्निचर व घरगुती वस्तू जळून खाक झाल्याने सुमारे ८० लाख २० हजार रुपयांचे नुकसान झाले आहे.

आगीचा मोठा आवाज झाल्याने दुकानमालक सोहन सुहास गांधी यांनी बाहेर येऊन पाहिले असता दुकानाला भीषण आग लागलेली दिसून आली. आग इतकी भडकल्याने गांधी कुटुंबीयांना घरातून बाहेर पडणेही कठीण झाले. अखेर खिडकीच्या गज वाकवून आई-वडील, पत्नी व दोन मुलांसह सर्वांनी जीव वाचवला. सुदैवाने कोणतीही जीवितहानी झाली नाही.

घटनेची माहिती मिळताच विविध अग्निशामक दलांनी घटनास्थळी धाव घेतली. अकलूज नगरपरिषदेचा पाण्याचा टँकर, स. म. शंकरराव मोहिते-पाटील साखर कारखाना (शंकरनगर), श्री शंकर सहकारी साखर कारखाना (सदाशिवनगर) येथील अग्निशामक दलांनीही मदतकार्य केले. पांडुरंग सहकारी साखर कारखाना, श्रीपूर येथील अत्याधुनिक अग्निशामक यंत्रणेसह दाखल झालेल्या पथकाने आगीवर नियंत्रण मिळवण्यात निर्णायक भूमिका बजावली. त्यांच्या वेगवान, शिस्तबद्ध आणि कौशल्यपूर्ण कारवाईमुळे आग आजूबाजूच्या इमारतींमध्ये पसरण्यापासून रोखता आली आणि मोठा अनर्थ टळला.

या आगीत दुकानातील २२ इलेक्ट्रिक मोटर्स (पंप), ४ रोल सबमर्सिबल केबल, सुमारे २० पिठाच्या चक्क्या व मिरची कांडप मशीन, पीव्हीसी पाइप्स व फिटिंग साहित्य, शेतीखते, इलेक्ट्रिक साहित्य, घरगुती फर्निचर, एक होंडा सिटी कार व दोन दुचाकी जळून खाक झाल्या.

आगीचा फटका शेजारील आयडीएफसी फर्स्ट बँकेलाही बसला असून बँकेचे शटर, फर्निचर, एसी, सीसीटीव्ही यंत्रणा तसेच धन्यकुमार उपाध्ये यांची बुलेट दुचाकी व रिक्षा जळाल्या आहेत.

या घटनेची नोंद अकलूज पोलिस ठाण्यात अकस्मात जळीत म्हणून करण्यात आली असून पोलीस हेडकॉन्स्टेबल रणवरे अधिक तपास करीत आहेत.

🧯 चौकट (Highlight)

🔥 रूपाली मशीनरीला लागलेली आग आटोक्यात आणण्यात आग विझवण्यासाठी अकलूज नगरपरिषदेच्या पाण्याचा टॅंकर,स.म.शंकरराव मोहिते- पाटील कारखाना अग्निशामक दल शंकरनगर,पांडुरंग सहकारी साखर कारखाना आग्निशशामक दल श्रीपूर,श्री शंकर सहकारी साखर कारखाना आग्निशामक दल सदाशिवनगर यांच्या अथंग प्रयत्नामुळे आगीवर नियंत्रण आले.त्यामुळे पुढील अनर्थ टळला. पण या आगीत वित्त हानी मोठी झाली आहे. पांडुरंग सहकारी साखर कारखाना, श्रीपूर येथील अग्निशामक दलाचे योगदान अत्यंत मोलाचे ठरले. वेळीच घटनास्थळी पोहोचून शक्तिशाली पाण्याचे फवारे, आधुनिक उपकरणे आणि प्रशिक्षित मनुष्यबळाच्या साहाय्याने त्यांनी आगीचा वेग आटोक्यात आणला. त्यांच्या तत्परतेमुळे शेजारील इमारती व नागरिकांचे प्राण सुरक्षित राहिले.