महाळुंग, भीमनगर मध्ये आंबेडकर जयंती उत्साहात | ऐक्य व बंधुभावाचा संदेश

ध्वजारोहण ते अभिवादन… भीमनगरात आंबेडकर जयंती उत्साहात साजरी

महाळुंग (ता. माळशिरस) : डॉ. बाबासाहेब आंबेडकर यांच्या जयंतीनिमित्त भीमनगर, महाळुंग येथे उत्साहपूर्ण आणि प्रेरणादायी वातावरणात अभिवादन कार्यक्रम पार पडला. यावेळी डॉ. बाबासाहेब आंबेडकर यांच्या प्रतिमेचे पूजन करून उपस्थितांनी विनम्र अभिवादन केले.

कार्यक्रमाची सुरुवात पांडुरंग सहकारी साखर कारखान्याचे कार्यकारी संचालक मा. यशवंत कुलकर्णी यांच्या हस्ते ध्वजारोहणाने करण्यात आली. त्यानंतर डॉ. आंबेडकर यांच्या प्रतिमेस पुष्पहार अर्पण करून सर्व उपस्थितांनी अभिवादन केले. यावेळी उपस्थितांनी त्यांच्या कार्याची आठवण ठेवत त्यांच्या विचारांवर चालण्याचा संकल्प व्यक्त केला.

या कार्यक्रमाचे उत्कृष्ट आयोजन रिपब्लिकन पार्टी ऑफ इंडिया चे उपजिल्हाध्यक्ष शामराव भोसले, त्यांचे चिरंजीव युवा कार्यकर्ते सुधीर भोसले तसेच त्यांच्या सहकाऱ्यांनी केले. कार्यक्रम शिस्तबद्ध, नियोजनबद्ध आणि प्रभावी पद्धतीने पार पडला.

या प्रसंगी महाळुंग गावचे नगराध्यक्ष, उपनगराध्यक्ष, सर्व नगरसेवक, गटनेते तसेच गावातील प्रतिष्ठित नागरिक आणि समाजबांधव मोठ्या संख्येने उपस्थित होते. सर्वांनी एकत्र येत सामाजिक ऐक्य, बंधुभाव आणि एकात्मतेचा संदेश दिला. शेवटी सर्वांनी डॉ. बाबासाहेब आंबेडकर यांच्या कार्याला अभिवादन करून कार्यक्रमाची सांगता करण्यात आली.